बारामती : राज्याच्या राजकारणाला हादरा देणाऱ्या विमान अपघातात ज्येष्ठ नेते अजित पवार यांचे निधन होऊन शनिवारी (दि. 28) एक महिना पूर्ण झाला. या पार्श्वभूमीवर त्यांचे पुतणे युगेंद्र पवार यांनी सोशल मीडियावर भावनिक पोस्ट शेअर करत आपल्या भावना व्यक्त केल्या असून ती पोस्ट सध्या मोठ्या प्रमाणात चर्चेत आली आहे.
बारामतीमध्ये झालेल्या दुर्दैवी विमान अपघातात अजित पवार यांचे आकस्मिक निधन झाले होते. त्यांच्या निधनामुळे राज्याच्या राजकीय व सामाजिक क्षेत्रात मोठी पोकळी निर्माण झाली आहे. गेल्या महिनाभरात राज्यभरातून कार्यकर्ते, नागरिक आणि विविध क्षेत्रातील मान्यवरांनी त्यांना श्रद्धांजली अर्पण केली. अजित पवार यांच्या कार्यशैलीची, निर्णयक्षम नेतृत्वाची आणि जनतेशी असलेल्या घट्ट नात्याची आठवण अनेकांनी काढली.
निधनाच्या घटनेला आज एक महिना पूर्ण होत असताना पुतणे युगेंद्र पवार यांनी सोशल मीडियावर भावनिक शब्दांत काका अजित पवार यांच्या आठवणींना उजाळा दिला. आपल्या पोस्टमध्ये त्यांनी अजित पवार हे केवळ राजकीय नेते नव्हते, तर कुटुंबासाठी आधारवड आणि मार्गदर्शक होते, असे नमूद केले. त्यांच्या मार्गदर्शनामुळेच आयुष्यात पुढे जाण्याची प्रेरणा मिळाली, असेही त्यांनी लिहिले आहे.
युगेंद्र पवार यांनी पोस्टमध्ये अजित पवार यांच्या साधेपणाचा, कामाप्रती असलेल्या निष्ठेचा आणि लोकांसाठी झटणाऱ्या स्वभावाचा उल्लेख करत त्यांच्या आठवणी कायम प्रेरणा देत राहतील, अशी भावना व्यक्त केली. “तुमची उणीव प्रत्येक क्षणी जाणवते, पण तुमचे विचार आणि शिकवण आम्हाला पुढे जाण्याची ताकद देतात,” अशा आशयाचे भावनिक शब्द त्यांनी शेअर केले आहेत.
दरम्यान, अजित पवार यांच्या स्मृतिदिनानिमित्त बारामतीसह राज्यातील विविध ठिकाणी श्रद्धांजली कार्यक्रमांचे आयोजन करण्यात आले. कार्यकर्त्यांनी त्यांच्या प्रतिमेला पुष्पहार अर्पण करत त्यांच्या कार्याचा वारसा पुढे नेण्याचा निर्धार व्यक्त केला.
अजित पवार यांच्या अचानक झालेल्या निधनानंतर राज्याच्या राजकारणात मोठे बदल घडून आले असून त्यांच्या अनुपस्थितीची जाणीव आजही कार्यकर्ते आणि नागरिकांना प्रकर्षाने होत आहे. त्यांच्या स्मृतींना उजाळा देत अनेकांनी सोशल मीडियावर भावना व्यक्त केल्या असून युगेंद्र पवार यांची पोस्ट विशेष चर्चेचा विषय ठरली आहे.
अजित पवार यांच्या निधनाला एक महिना पूर्ण; पुतणे युगेंद्र पवार यांची भावनिक सोशल मीडिया पोस्ट चर्चेत
